Dewan Solidaritas sei hili Lideransa Foun no Trasa Programa

Dili,  Radio Liberdade online–  Dewan Solidaritas Mahasiswa Pemuda Pelajar Timor-Timur (DSMPPTT) sei hala’o kongresu estraordináriu iha loron Sábadu (18/6) to’o Domingu (19/6) iha Centro Formasaun Judiciaorio, Caicoli, Dili ho objetivu atu defini ninia estatuta, estabelese estrutura foun no trasa programa hodi kontribui ba prosesu dezenvolvimentu nasionál.

Prezidente Steerring Commitee ba Kongresu Estraordináriu, Jose Magno hato’o lia hirak ne’e durante enkontru preparasaun ne’ebé realiza iha Sábadu (11/6) iha Edefisiu Sekertariadu Estadu Juventude Desportu (SEJD, Licidere, Dili.
Bazea ba komunikadu Imprensa ne'ebe radio liberdade asesu katak "Dewan Solidaritas sei realize Kongresu Estraordináriu ida hodi define estatuta, estrutura foun ne’ebé klaru no defini programa sira importante nu’udar prioridade ba tempu tuir mai. Parte husi ne'e sei defini estratéjia hodi rekolla dadus atu  fó rekoñesimentu ba membru sira Dewan nian,” Magno haktuir iha ekontru ne’e.

Dosente Fakuldade Siensia Politíka UNTL ne’e afirma katak Sekertariu Estadu Juventude Desportu, Leovogildo Hornai mak sei loke kongresu refere hodi hato’o ninia pelestra, nune’e bele loke kongresista sira nia vizaun hodi kontribui ba prosesu tomak iha kongresu ne’e.

Magno mós hato’o katak Partisipante 300 mak sei hola parte iha kongresu ne’e no nu’udar reprezentasaun husi munisipiu no organizasaun filiál sira hanesan, POLITEKNIK, IPI, PGSD, PAM-KT, STIE no IMAPTIL.

“Partisipante kongresu nian mak membru Dewan nian ne’ebé kuaze mai husi postu administrativu no munisípiu no mós organizasaun estudantíl filiál nian hanesan, POLITEKNIK, IPI, PGSD, PAM-KTL no IMAPTIL,” nia esplika.

Dewan Solidaritas mak organizasaun massa universitáriu, estudantíl no juventude ne’ebé públikamente harii iha Kampus Universitas Timor Timur iha Kaikoli, Díli, iha 8 Juñu 1998, nu’udar meius ida atu hatutan hakarak lulik hosi povu Timor-Leste liuhosi meius demokrátiku ba ukun-rasik-an. 

Durante 1998-1999, Dewan Solidaritas, depois hala’o diálogu abertu no loke palku libertasaun nian iha UNTIM no edifísiu sira seluk ne’ebé estratéjiku iha Díli, deside atu hala’o mós atividade hanesan iha distritu no sub-distritu sira iha Timor-Leste, hodi promove espíritu solidariedade Timorense, rekonsiliasaun no unidade nasionál nu’udar pre-kondisaun ba prosesu demokrátiku ne’ebé internasionálmente aseitável.  

Ativista Dewan balu tenke lakon vida no balu fali hetan tortura tan ninian aktu polítiku hirak ne’e molok, durante no depois konsulta populár. Depois referendum, tuir kompromisu polítiku, ativista Dewan Solidaritas fila ba universidade hodi kontinua sira-nia estudu no envolve an iha setór edukasaun, hahú hosi ensinu primáriu, sekundáriu to’o ensinu superiór, depois liu 80% edukadór Indonézia fila ba sira-nia rai iha 1999. To’o ohin-loron, kuaze 90% hosi edukadór sira iha Timor-Leste mai hosi Dewan Solidaritas.