Primeiru-Ministru Partisipa Sorumutuk Ho Desixor Politiku Iha Bruxelas no Estadus Unidus

Xefe Governu sei partisipa iha sorumutuk balun ho desizor polítiku no personalidade influente (ema ne’ebé iha kbiit atu bele fó nia hanoin ruma) sira iha Bruxelas, Washington no Novaiorke, nia objetivu maka hodi hadi’a kooperasaun internasionál no hodi aprezenta pozisaun Governu nian kona-ba problema interese nasionál nian sira. Primeiru-Ministru husik hela Díli hodi bá Bruxelas iha tersa, loron 14 fulan-juñu, hodi partisipa iha forumEuropeu ba problema dezenvolvimentu no kooperasaun internasionál, no Jornadas Europeias ba dezenvolvimentu nian. Sei hasoru-malu ho Prezidente Repúblika Sentru-Afrikana, Primeiru-Ministru Repúblika Federál Demokrátika Etíopia no Ministru Dezenvolvimentu Internasionál Suésia, hodi debate forma asisténsia ne’ebé efisiente. Nune’e mós sei halo diskursu ida, ne’ebé foka liubá iha area dezenvolvimentu Timor-Leste nian, no hodi esplika progresu ne’ebé maka hetan ona iha aplikasaun ba Objetivu Dezenvolvimentu Sustentavel sira Nasoins Unidas nian.

Iha marjen forum nian, sei hala’o sorumutuk bilaterál ho lider nasionál sira.

Primeiru-Ministru mós sei vizita Estadus Unidus Amérika, liuliu iha Washington DC no Novaiorke, ne’ebé sei hasoru-malu ho kuadru sira Administrasaun Obama no dirijente polítiku sira, nune’e mós ho grupu reflesaun nian sira (“think tanks”) no forum sira seluk, hodi promove interese Timor-Leste nian sira, inklui esforsu nasaun nian hodi estabelese nia-fronteira marítima sira.

Portavós, Ministru Estadu Agio Pereira, hateten katak “ Governu promete fó apoiu hodi hadi’a kooperasaun internasionál ba dezenvolvimentu no kontinua sai hanesan defensór ba implementasaun objetivu Dezenvolvimentu Sustentavel nian. Aleinde ne’e, presiza konta ho apoiu internasonál no rekoñesimentu ba ita-nia esforsu hodi hetan delimitasaun ita-nia fronteira marítima sira. Tanba motivu tolu ne’e, viajen Primeiru-Ministru nian ne’e importante no akontese iha momentu estratéjiku ba interese nasionál sira”.